«Челны-Бройлер» корхонасида паррандаларни шаръий йўл билан сўйиш жараёнининг тақдимоти бўлиб ўтди. Ўтган ҳафта Татаристоннинг Тўқаев туманида парранда гўштини қайта ишлашга ихтисослашган «Челны-Бройлер» корхонасида ҳалол маҳсулотлар тақдимоти бўлиб ўтди. Татаристон Республикаси Мусулмонлар диний идорасининг Набережные Челны муҳтасиботи ҳамда корхона раҳбариятининг саъй-ҳаракатлари билан паррандаларни сўйиш ва улардан гўшт маҳсулотлари тайёрлашнинг исломий талабларга тўлиқ риоя қилган ҳолатда бориши Татаристон қозиси Жалил ҳазрат Фазлиев, ТР МДИ «Ҳалол» стандарти бўйича қўмита раиси Динар Содиқов, Татаристон уламолари кенгаши раиси Рустам Ботиров, республиканинг турли вилоятларининг қозилари, туман муҳтасиб имомлари ҳамда масжидларнинг имомлари томонидан назоратдан ўтказилди. Шунингдек, тақдимотга мазкур маҳсулотлар савдоси билан шуғулланувчи тадбиркорлар ва бошқа меҳмонлар таклиф қилинди.

«Ҳалол» стандарти бўйича қўмита эксперти Фаат ҳазрат Муҳаммедовнинг айтишича, мазкур корхонада бу қадар кенг кўламли тафтиш илк бор ўтказилди. Барча меҳмонлар корхонада ҳалол маҳсулот ишлаб чиқариш бўйича шаръий талабларга тўлиқ риоя этилаётганлигини ўз кўзлари билан кўриб, гувоҳ бўлдилар. Комиссия аъзоларидан ташқари, ҳалол маҳсулот ишлаб чиқариш жараёни билан танишиш учун оммавий ахборот воситалари ҳам таклиф қилинди.

Ишлаб чиқариш жараёнини томоша қилиш учун келган меҳмонлар гигиеник ва санитария кўригидан ўтказилдилар. Ҳар бир иштирокчига махсус оппоқ либос ва пойафзал берилди, цехларга киришдан аввал эса улар қўлларини махсус эритмада ювдилар.

Ана шундай тайёргарликдан кейингина колбаса ишлаб чиқариш цехининг иш жараёни билан танишув бошланди. Корхонада ишлаб чиқарилаётган маҳсулотлар «Ҳалол» деб ёзиб қўйилган яшил рангли махсус идишларгагина солинар экан.
Энг муҳими, ҳар бир назоратчи кушхонада ҳар бир парранданинг фақат шаръий йўл билан – фақат қўлда, ўткир пичоқ билан, «Бисмиллаҳ! Аллоҳу акбар» деб баралла айтиб сўйилаётганлигини ўз кўзи билан кўрди.
Таъкидлаб ўтиш лозимки, бу ҳалол гўшт маҳсулоти ишлаб чиқаришнинг энг муҳим шартидир. Зеро, кўпгина йирик гўшт ишлаб чиқариш корхоналари, парранда фабрикаларида конвейер усулида сўйиш йўлга қўйилган бўлиб, бунда Аллоҳнинг исми автоматлаштирилган сўйиш конвейерини ишга туширувчи тугмани босишдан аввалгина айтилмоқда. Афсуски, бугунги кунда ҳалол маҳсулотлар бозорига чиқарилаётган маҳсулотларнинг аксарияти ана шундай корхоналарда тайёрланмоқда. Ачинарлиси шундаки, кўпгина дўконлар қўлда сўйилган эмас, балки улгуржи нархлари арзон бўлгани учун айнан шу йўл билан тайёрланган маҳсулотларни кўпроқ сотиб олмоқдалар.

«Челны-Бройлер» корхонаси ўзининг ҳалол маҳсулотлар ассортименти билан мақтанса арзийди. Комиссия аъзолари ҳамда таклиф қилинган меҳмонлар корхонада тайёрланаётган маҳсулотлардан татиб кўриб, ана шундай фикрга келдилар. Бугунги кунда «Челны-Бройлер» корхонасида 40 дан ортиқ турдаги ҳалол маҳсулотлар ишлаб чиқарилмоқда. Айни пайтда, турли хил янги маҳсулот турларини ишлаб чиқиш бўйича изланишлар олиб борилмоқда.  «Челны-Бройлер»нинг ҳалол маҳсулотлари Россиянинг 11 минтақасида сотилмоқда. Бироқ савдо ҳажмининг асосий қисми Татаристоннинг ўзига тўғри келади – маҳсулотнинг 88 фоиз қисми республиканинг ўзида истеъмол қилинмоқда. Бироқ, маҳсулотларга бўлган талаб йилдан йилга ортиб бормоқда. Меҳмонларга тарқатилган маълумотномаларга кўра, 2004 йилдан 2010 йилга қадар ишлаб чиқариш ҳажми йилига 40 тоннадан 4 минг тоннагача ортган.
«Албатта, бу яхши кўрсаткич, – дейди корхона директори Залил Хасанов, – Бироқ биз сон ортидан қувмаймиз, чунки маҳсулотимиз ўзига хос бўлганлиги туфайли, бизни асосан сифат қизиқтиради».

Бу қадар кенг кўламли корхонага ташриф анчагина катта таассурот қолдирди. Дарҳақиқат, мусулмон киши ўзи истеъмол қилаётган таомнинг шариат талабларига тўлиқ риоя этилган ҳолда тайёрланаётганлигини кўрса, хотиржам тортиб, кўнглидаги шубҳалари арийди. Корхонадаги ҳалол маҳсулот тайёрлаш жараёни – назоратчилар, тафтишчиларнинг кўзи учунгина намойиш қилинган, махсус уюштирилган ҳолат эмас, одатий ҳолдир. Корхона директори республика қозилари билан бўлган суҳбатда шундай деди:
«Биз бу ишни эртага Аллоҳ таолонинг ҳузурида туриб, амалларимиз учун ҳисоб беришимизни ҳис қилган ҳолда бошлаганмиз. Шунинг учун, маҳсулотимизнинг сифати учун аввало харидор эмас, Яратганнинг олдида жавоб берамиз».

Аҳмад Ҳолиқов, info-islam.ru