Қозоғистоннинг Петропавловск шаҳри дўконларида «ҳалол» деб белгиланган, аммо таркибида чўчқа ДНКси аниқланган от гўшти тушёнкаси топилди, деб хабар беради LITER нашри. Мазкур маҳсулотни текширишни «Мангистау вилояти истеъмолчилар ҳуқуқларини ҳимоя қилиш жамияти» Санитария-эпидемиология экспертиза маркази ёрдамида ўтказган.

Текширув давомида айрим «ҳалол» маҳсулотларда таркибий мосликда номутаносибликлар, шу жумладан бир нечтасида чўчқа ДНКси борлиги аниқланган.

«ГОСТ талабларига кўра, от гўшти тушёнкасининг таркибида фақат от гўшти, ёғ ва зираворлар бўлиши керак. Чўчқа ДНКсининг аниқланиши ишлаб чиқариш технологиясининг қўпол бузилиши ва ишлаб чиқарувчининг виждонсизлигига ишорадир», – дейди эксперт Жанна Биятан.

«Одатда, маҳсулотга „ҳалол“ статутисини беришдан олдин у кўплаб текширув босқичларидан ўтади. Унинг таркибида мусулмонлар учун тақиқланган чўчқа ва унга алоқадор моддалар бўлмаслиги шарт. Маҳсулотни „ҳалол“ деб эълон қилиш ва унга чўчқа маҳсулотларини қўшиш ишлаб чиқарувчиларнинг виждонсизлигига далилдир», – дейди жамият вакиллари.

Бундай ҳолатлардан қочиш учун мутахассислар «ҳалол» тамғасига эга гўшт маҳсулотларини машҳур ва ишончли ишлаб чиқарувчилардан харид қилишни тавсия қиладилар. Шунингдек, ГОСТ стандартига мувофиқ ишлаб чиқарилган ва Евросиё иттифоқи давлатлар бозорида айланма белгилари (ЕАС) билан белги қўйилган маҳсулотларни харид қилишни маслаҳат берадилар. Бу маҳсулотнинг барча сифат ва хавфсизлик стандартларига жавоб беришини кафолатлайди.

Абу Муслим тайёрлади