Алкоголсиз, ҳалол қилиб ишлаб чиқарилган пиво ортидан ишбилармонлар ҳалол виски ишлаб чиқаришни ҳам ўйлаб топишмоқда.

Американинг Arkay Beverages (Аркай Ичимликлари) компанияси 2011 йилнинг 1 декабридан бошлаб АҚШ ва Оврўпа ҳудудида “дунё бўйича энг дастлабки виски”ларни савдога чиқармоқда.  Мазкур ичимликни ишлаб чиқарувчиларнинг таъкидлашича, бу вискининг ташқи кўриниши ҳам, таъми ва хиди ҳам илгариги билан бир хил, ўткир бўлади.
Arkay Beverages компаниясининг хабарларига кўра, ушбу ичимликнинг тайёрланишига қарийб 5 йил вақт сарфланди; сўровномалар ўтказилди, дегустациялар (таъм кўришга боғлиқ турли фаолиятлар) олиб борилди.
Бу ичимликнинг яна бир номи – «Halal whisky» бўлиши кутилмоқда. Зеро, у – ҳалоллик шартларининг барчасига жавоб бера олади.
ArKay “виски”сининг таркибида – сув, глицерин, 1-бутанол, табиий ва сунъий ароматизаторлар (ҳуштаъм берувчи моддалар), сут кислотаси, пиширилган қанд, калий сорбати, аспартам, К ацесульфами ҳамда фенилаланин мавжуд.
Тайёрловчиларнинг маълум қилишича, “истаган киши ичиши мумкин бўлган ушбу ажойиб ичимлик” чинни ва альюмин идишларда сотилади. 1 литрли чинни идишдагиси – 10 доллар, 335 миллилитрли альюмин идишдагиси эса – 4 доллардан сотилади.
Ишлаб чиқарувчи компаниянинг айтишича, мазкур ичимлик ОИЖ (Оврўпа Иқтисодиёт Жамияти) ҳамда Америка тартибот вакиллари (FDA)нинг барча талабларига тўлиқ мос келади.