Жанубий африкалик мусулмонлар мамлакатнинг йирик гўшт импорт қилувчи ширкатининг чўчқа гўштига "ҳалол" ёрлиғи ёпиштиргани ҳақидаги даъволардан ғазабга келишган.

Кейптаундаги Orion Cold Storage ширкати бошлиғи иддаолар ўртага чиққанидан буён ўлим ҳақида таҳдидлар олганини айтган. У рақобатчи ширкатларнинг ўзини ёмонотлиқ қилиш кампанияси қурбони бўлганини айтмоқда.
Мусулмон ширкатлар Orion ширкатини озиқ-овқат исломий қонунларга мувофиқ ҳозирланганини англатувчи "ҳалол" ёрлиғини ишлатишдан маҳрум этувчи маҳкама қарорини олишган.
Ширкат, шунингдек, Австралиядан келтирилган кенгуру ва Ҳиндистон буйволига "ҳалол" ёрлиқлари ёпиштирганликда айбланмоқда.
Бу ёрлиқлар мамлакатда "ҳалол" сертификатларини берувчи Жанубий Африка Мусулмонлар кенгаши томонидан маъқулланмаган бўлган. Кенгаш Оrion ширкати билан алоқаларни узганини айтган.
Ўз навбатида Orion икки рақиб бизнесменга қарши саботаж, шантаж ва таъмагирлик айбларини илгари сурган.
Ширкат айрим чўчқа гўштларига ҳақиқатан ҳам "ҳалол" ёрлиғи ёпиштирилганини эътироф этган, аммо рақиб ширкатлар ўзининг айрим ходимларига маҳсулотлар ва ёрлиқларни алмаштириб қўйиш учун пул тўлаганини иддао қилган.
Orion раҳбари маҳкама даъвоси нима билан тугашидан қатъий назар, ширкат ўз обрўсини қайта тиклаши учун йиллар кетишини айтган. У ўлим билан таҳдид этилганини айтмоқда.
Ширкатнинг бир неча автоуловларига шикаст етказилган.

Манба: bbc.com