Савол: Шариатимизга кўра нималарнинг савдоси дуруст бўлмайди?

Жавоб: Қуйидаги нарсаларнинг савдоси дуруст бўлмайди:
– ҳаром бўлган ва истеъмоли тақиқланган нарсалар – қон, ҳаром ўлган ҳайвон гўшти, хамр, чўчқа ва унинг гўшти каби нарсалар савдоси;
– савдоси дуруст молнинг дуруст бўлмаган молга қўшиб сотиш, масалан, ҳалол сўйилган мол гўштини ҳаром ўлган мол гўштига қўшиб сотиш (иккисининг ҳам савдоси бузуқ бўлади);
– ҳалол молни ҳаром мол эвазига сотиш ёки айрбошлаш, масалан, газмол бериб, ароқ олмоқ ёки аксинча;
– сувдаги балиқни, осмонда учиб юрган парранда ва қушларни тутиб олмай, тоғдаги ўтинни териб-тўпламасдан илгари сотиш;
– савдо қилинганда харидорга топширишга қодир бўлмаган нарсаларни сотиш, масалан, тутиб ҳовузга ташлаб қўйилган балиқ каби;
– харидорга берганда ўзи зарар кўрадиган нарсаларни сотиш, масалан, уйининг хари, тўсинларини;
– алданмоқ эҳтимоли бор нарсаларни сотиш, масалан, она қорнидаги болани;
– аниқ бўлмаганидан жанжалга сабаб бўладиган нарсаларни, қўй устидаги жунни сотиш;
– дарахтдаги мевани ундан узиб қуритилган мевага чамалаб сотиш;
– одам аъзоларини, масалан, сочи, сути каби;
– ҳаром ўлган мол ва қўйларнинг терисини ошламай (ҳўлини кеткизмай) сотиш;
– сотган нарсасини пулини тўламай, сотган нархидан арзонга сотиб олиш;
– савдо тақозо қилмаган, аммо сотувчи ё олувчидан бирига фойдали бўлган шарт билан сотиш мумкин эмас.

"Динда саволим бор" китобидан