Яра ва касалликнинг давоси фақат бу ҳаромларнинг бирининг кўлланишига боғлиқ бўлиб қолган ҳолат ҳақида фуқаҳоларнинг фикрлари турличадир. Баъзилар даво заруратини очлик зарурати қадар муҳим деб билмайдилар ва далил сифатида Имом Бухорий Ибн Масъуддан ривоят қилган шу ҳадисини келтирадилар: "Аллоҳ таоло шифоларингизни сизга ҳаром қилинган нарсаларда қолдирган эмасдир".
Баъзилар эса даволаш заруратини очлик ҳолатидаги сингари зарурий деб биладилар. Зеро ҳар иккиси ҳам ҳаётнинг давомийлиги жиҳатидан муҳимдир. Бундай қараш тарафдорлари эса, Расулуллох саллаллоҳу алайҳи вассалом ипак умуман харом эканлигини билдирган ҳолда қичима касаллигига чалинган Абдурахмон ибн Авф ва Зубайр ибн Аввом разияллоху анҳуларга ипак кийим кийишга рухсат берилганлигини далил сифатида кўрсатадилар. (Бу хакда "Кийим ва безак" бўлимида батафсил сўз юритамиз).
Балки бу фикр ўзининг ҳар васият ва дастурида инсон ҳаётини биринчи ўринга қўядиган Ислом динининг умумий руҳига янада яқиндир.
Аммо ҳаром бўлган бир нарсани дори ўлароқ кўллашликнинг баъзи шартлари бор:

1.    Буни қўлланмаганлари такдирда инсон ҳаёти ва саломатлигининг жиддий бир хавф остида бўлишлиги;
2.    Унинг ўрнини боса оладиган халол бир дорининг йўқлиги;

Бу дорини дин ва иймонига содиқ, ишончли мусулмон бир шифокорнинг тавсия килишлиги... Шу ўринда хаётий ва илмий далилларга асосланган ҳолда шуни таъкидлаймизки: Бу харомлардан бирини дори сифатида фойдаланишга мажбур киладиган ҳеч бир тиббий зарурат мавжуд эмас. Фақатгина биз бу ҳаромларнинг бошқа нарсалар бўлмаган жой ва минтақаларда яшайдиган мусулмонлар учун эхтиёт сифатида фатво хукмини бераяпмиз.

Юсуф Қаразовийнинг “Исломда ҳалол ва ҳаром” китобидан
Абу Муслим тайёрларди